Derisa Zyra Ligjore e Ministrisë së Sportit kishte dhënë opinion se në Kuvendin e FFK-së të korrikut të vitit 2018 kishte parregullsi në procesin e zgjedhjes së Agim Ademit kryetar të FFK-së, prej të cilit opinion u distancua ministri Kujtim Gashi që ka thënë se atë e ka shkruar një individ, kurse lidhur më këtë opinion ka dhënë edhe Ministria e Administratës Publike.

Departamenti i OJQ-së i kësaj ministrie i ka dhënë opinion FFK-së, përmes të cilit Agim Ademin e vlerëson si legjitim, edhe atë me mandat katërvjeçar. Sipas këtij opinioni të Ministrisë së Administratës Publike, Ademi gëzon mandat deri në vitin 2022, e jo deri në vitin 2020, siç kërkon grupi i tij opozitar.

“Është evidentuar e tërë procedura e zhvilluar dhe rezulton se janë respektuar dispozitat e Statutit me rastin e organizimit dhe mbajtjes së këtij kuvendi”, thuhet në opinionin e kësaj ministrie, raporton “Express”. “Përfaqësuesi i autorizuar – kryetari i FFK-së është zgjedhur me mandate 4 (katër) vjeçar, ashtu siç parashihet në nenin 39 të Statutit, nga delegatët e Kuvendit të FFK-së”, thuhet në opinionin e Ministrisë se Administratës Publike.