Me qëllim të zbatimit të reformave fiskale, ministri i Financave Bedri Hamza përveç që ka sjellë në fuqi vendimet për lirim nga tatimi doganor dhe akciza për lëndën e parë, gjysmë produktet, linjat e prodhimit, gjithashtu nga java e ardhshme do të lirohen pajisjet e Teknologjisë Informative, për të gjithë qytetarët e Republikës së Kosovës duke përfshirë edhe pjesët rezervë për pajisjet e prodhimit si dhe është duke e rishqyrtuar edhe legjislacionin e tatimit në të ardhura personale, të ardhura të korporatës, Ligjin e TVSH-së dhe Ligjin e Administratës dhe Procedurës Tatimore.

“Përmes rishikimit të legjislacionit, Ministria e Financave do të ndihmojë zhvillimin e sektorit privat, në këtë rast sektorin e prodhimit që të ketë mundësi më të mëdha të zhvillimit të prodhimtarisë dhe ofrimit të shërbimeve jo vetëm brenda vendit tonë por edhe jashtë”, është thënë në komunikatën e MF-së.

Ministria e Financave ka theksuar se rezultat shumë pozitiv është arritur përmes vendimeve për lirim nga tatimi doganor dhe akcizës.

“Tani do të vazhdojmë me reformën ligjore më të madhe në vendin tonë me Ligjin e tatimit mbi vlerën e shtuar, ku përveç lirimit të lëndës së parë e cila prodhohet në vendin tonë, nga tatimi i vlerës së shtuar do të bartet mbledhja e tatimit të vlerës së shtuar nga kufiri në brendësi të vendit, kjo reformë do të jetë një ndihmë shumë e madhe për biznesin për arsye se në të ardhmen bizneset nuk do të kenë të obligueshme të paguajnë paraprakisht tatimin e vlerës së shtuar në kufi me rastin e importimit pa e shitur mallin, por do ta paguajnë në brendësi të vendit pas periudhës së rregullt ligjore”, është bërë me dije në komunikatën e Ministrisë së Financave.

Sipas MF-së, kjo reformë mundëson që bizneset të kenë likuiditet më të madh.

“Biznesi do të ketë mundësinë që të investojë më shumë në zgjerimin e biznesit dhe do të kursehet nga kreditë dhe interesat e ndryshme bankare që kanë qenë të obliguar t’i marrin për të paguar tatimin e vlerës së shtuar në kufi. Kosova prinë për këtë reformë të madhe dhe të guximshme në rajon, por ministri i Financave është i përkushtuar për të bërë reforma që e ndihmojnë sektorin privat dhe që e luftojnë burokracinë dhe informalitetin me të vetmin qëllim që Kosova të jetë atraktive për investitorët e vendit dhe të huaj”, është thënë në komunikatën e kësaj ministrie.

Më këtë rast, ministri i Financave, Bedri Hamza, ka ftuar të gjithë komunitetin e biznesit dhe gjithë bizneset individuale që të vazhdojnë të ndihmojnë ministrinë me kërkesa dhe këshilla në mënyrë që t’i ndihmojnë ata në kalimin e sfidave me të cilat përballet biznesi gjatë punës së përditshme në të bërit biznes.