Ministri i Mbrojtjes, Armend Mehaj, ka njoftuar se gjatë muajit shkurt do të zhvillojnë procesin selektues i cili përzgjedh vajzat e djemtë e FSK-së që dëshirojnë të bëhen pjesëtarë të operacioneve speciale.

Mehaj ka thënë se në këtë proces selektues mund të marrin pjesë të gjithë ushtarakët nga grada ushtar deri në gradën toger.

“Pas këtij procesi, ushtarakët e përzgjedhur kanë mundësinë të vazhdojnë Kursin Bazë të Forcave Speciale në Republikën e Shqipërisë. Tregoni potencialin tuaj dhe bëhuni pjesë e Operacioneve Speciale të FSK-së”, ka shkruar Mehaj.

Më tutje, Mehaj ka thënë se këta kandidatë, duhet të jenë të motivuar dhe të kenë aftësi të menaxhojnë situatat me presion të lartë.

Ai ka theksuar se pjesëtarët e përzgjedhur do të kenë mundësinë për trajnime në fusha të ndryshme me partnerët tanë lokal dhe ndërkombëtar duke shkëmbyer përvoja dhe shkathtësi në mënyrë që vendi ynë të gëzojë paqe dhe stabilitet të qëndrueshëm.

“Zhvillimi i karrierës suaj është në dorën tuaj. Shërbeni paqes dhe stabilitetit brenda dhe jashtë vendit në mënyrë profesionale krah për krah me njësinë tjera elitare të FSK-së”, ka shkruar Mehaj.