Komiteti Paralimpik i Kosovës ka mbajtur Kuvendin e punës për vitin paraprak 2021, në të cilin është diskutuar për funksionimin dhe konsolidimin e brendshëm të këtij institucioni si dhe për mbështetjen e sportistëve me aftësi të kufizuara në vendin tonë.

Nga pjesëmarrësit në këtë Kuvend u theksua nevoja që të bëhet më shumë në zhvillimin e infrastrukturës sportive për sportistët me aftësi të kufizuara në kuadër të Komitetit Paralimpik të Kosovës. Të pranishëm në këtë ngjarje ishin, ministri i Sportit, Hajrulla Çeku, presidentja e Komitetit Paralimpik të Kosovës, Njomza Emini, kryetari i Forumit Kosovar të Aftësisë së Kufizuar, Bujar Kadriu, dhe kryetari i Shoqatës së të Verbërve të Kosovës, Daut Tishuki.

Ministri Çeku në fjalën e tij ka theksuar se sporti është një nga dimensionet më të rëndësishme për të siguruar që personat me aftësi të kufizuar të jenë pjesë integrale e jetës sonë shoqërore, ekonomike, politike dhe kulturore, duke premtuar përkrahjen e MKRS-së në këtë drejtim. Qeveria e Kosovës, vitin 2022 e ka shpallur vit i personave me aftësi të kufizuara për të treguar kujdesin e veçantë dhe të shtuar për këtë kategori të shoqërisë.