Ministrja e Drejtësisë, Albulena Haxhiu, ka sulmuar ashpër prokurorin Blerim Isufaj që po synon të bëhet kryeprokuror.

Haxhiu ka adresuar në Kuvendin e Kosovës disa nga kritikat e deputetëve opozitarë në lidhje me arrestimin e shefit të KEK-ut, Nagip Krasniqi, javën e kaluar.

“Më lejoni të ju njoftojë që vetëm Ministria e Ekonomisë ka adresuar më shumë ndoshta se njëzetë lëndë, qoftë në polici e qoftë në prokurori! Për asnjërën prej tyre, asnjëherë, nuk është ftuar askush që i ka deponuar këto raste”, ka thënë Haxhiu.

Ajo ka përmendur edhe rastin e një prone publike duke e akuzuar direkt një ish-ministër.

“Kam gjetur në Ministrinë e Drejtësisë, ta zëmë, që prona publike nga ish-ministri e ish-drejtori i burgjeve i është dhënë privatit”, ka thënë ajo.

Sipas ministres, prokuroria kishte thënë se për këtë rast dëmi nuk ishte bërë dhe prandaj çështja nuk ishte trajtuar.

“Ju e dini shumë mirë se për çka përkushtohet qeveria Kurti. Neve na duhet një kryeprokuror që nuk e ka bishtin e zënë me derë…”, është shprehur Haxhiu.

Në mënyrë indirekte, Haxhiu e ka vlerësuar si të pa integritet Blerim Isufajn.

“Nuk mundemi edhe me shtatë vite me e çuar me një prokuror që është i paaftë, që nuk ka integritet moral…”, ka thënë Haxhiu, duke akuzuar partitë opozitare që kishin qenë të përfshirë në korrupsion e krim.