Ministrja e Shëndetësisë, Ogerta Manastirliu, ka deklaruar se deri më tani janë realizuar 190 misione të kryera në territor për t’u ardhur në ndihmë të lënduarve. “Ekipet mjekësore në gatishmëri po trajtohen 600 të lënduar ne spitale”, ka deklaruar ajo.

Manastirliu nga spitali rajonal i Durrësit ka bërë të ditur se po marrin shërbim nga 176 qytetarë në këtë spital, e që sipas saj, asnjë prej tyre s’është në gjendje të rëndë. “Kemi përforcuar ekipet e urgjencës, këtu në Durrës sapo kanë mbërritur ekipet e urgjencës nga Shkodra për të ndihmuar për përballimin e situatës. Në spitalet e Tirabës, Durrësit, Krujës, Kurbinit dhe Lezhës kanë marrë shërbim mbi 600 të lënduar si pasojë e tërmetit”, është shprehur Manastirliu, duke shtuar se janë marrë masa për furnizimin me medikamente dhe materiale mjekësore dhe ekipi i urgjencës po organizon shërbimin në territor.

“Janë mbi 500 thirrje të përballuara nga Urgjenca Kombëtare, e cila ka kryer 120 misione me autoambulancë. Ekipet mjekësore aktualisht është në gjendje gatishmërie të plotë në spitale”, ka deklaruar Manastirliu.

Ajo tutje ka thënë se Qeveria në bashkëpunim me policinë e shtetit po punojnë për të mbajtur situatën në kontroll. “Puna është në terren për të identifikuar rastet e personave që ende janë në kërkim nga strukturat shtetërore, janë hapur rrugët akset janë të llira nuk kemi raportime të vonesave sa i përket marrjes së ndihmës”, ka deklaruar Manastirliu.