Ministrja e Drejtësisë (MD), Albulena Haxhiu, ka reaguar pas rritjes enorme të çmimeve të disa produkteve në Kosovë.

Ajo ka thënë se rritja e çmimeve nuk është aspak normal dhe tërësisht e paarsyeshme.

Haxhiu ka rikujtuar se kurdisja dhe orkestrimi i çmimeve është vepër që sanksionet me burgim deri në 5 vite dhe gjobë shtesë.

Ajo ka kërkuar nga Prokuroria e Shtetit që të fillojë menjëherë hetimet.

“Ditëve të fundit dhe sidomos sot kemi vërejtur një ngritje enorme, aspak normale dhe tërësisht të paarsyeshme të çmimeve të produkteve ushqimore bazike të konsumatorëve nga subjektet tregtare. Kjo tendencë për keqpërdorim të situatës e dëmton jashtëzakonisht xhepin e qytetarëve dhe duhet të marrë fund sa më parë. Një kurdisje dhe orkestrim të të cilit po jemi dëshmitarë, është vepër penale e sansksionuar në mënyrë të dyfishtë, me burgim (1-5 vite) si dhe dënim shtesë me gjobë, bazuar në Kodin Penal të Republikës së Kosovës. Ftoj prokurorin e shtetit, që bazuar në kompetencat kushtetuese dhe ligjore të përcaktuara, të ndërmarrë menjëherë veprime në përputhje me mandatin e tij, kundër abuzuesve që po përfitojnë paligjshëm që me veprimet e tyre po dëmtojnë qytetarët e vendit tonë”, ka shkruar ajo në llogarinë e vet në “Facebook”.

Vaji në markete në Kosovë të enjten është shitur me çmim prej 3.49 euro.