Ministrja e Integrimit Evropian, Dhurata Hoxha, në kuadër të vizitës zyrtare në Republikën e Çekisë, të martën është pritur në takim nga Radek Koten, kryetar i Komisionit për Siguri në Parlamentin e Çekisë, si dhe nga Lubomir Zaoralek, kryetar i Komisionit për Politikë të Jashtme në Parlamentin e Çekisë.

Ministrja Hoxha e ka njoftuar kryetarin e Komisionit për Siguri në Parlamentin e Çekisë si dhe kryetarin e Komisionit për Politikë të jashtme, për reformat gjithëpërfshirëse të ndërmarra për procesin integrues si dhe plotësimin e të gjitha kritereve për liberalizimin e vizave, të parapara me udhërrëfyes.

Ministrja ka theksuar se qytetarët e Kosovës presin nga vendet mike, si Çekia, të njohë të arriturat dhe të mundësojë lëvizjen e lirë të qytetarëve tanë duke përkrahur votimin në Këshillin e Ministrave.

Ministrja Hoxha i ka njoftuar mikpritësit për reformat e ndërmarra në fushën e migracionit, me theks të veçantë në reformat legjislative të cilat fuqizojnë kontrollin e kufijve, politikat ndaj të huajve si dhe azilit.

“Kosova nuk paraqet rrezik sa i përket migracionit ilegal”, ka theksuar ministrja Hoxha, duke shtruar kemi gjithë infrastrukturën e duhur ligjore dhe institucionale.

Në diskutim, ministrja Hoxha ka kërkuar mbështetjen e Çekisë në fazat e mbetura të procesit për liberalizimin e vizave për Kosovën dhe ka theksuar se Kosova dhe qytetarët e saj e presin këtë vendim sepse që nga viti 2012 kemi punuar për të marrë rekomandimin pozitiv nga Komisioni Evropian.

Ajo ka shtuar se ky rekomandim është dëshmia më e mirë e punës së institucioneve tona.

Koten dhe Zaoralek, përgëzuan ministren Hoxha për reformat e ndërmarra dhe e siguruan atë se Çekia, përkrah Kosovën në procesin integrues siç e ka përkrahur edhe në proceset tjera të rëndësishme deri më sot.

Ministrja Hoxha gjatë kësaj vizite dyditore do të zhvillojë edhe takime tjera të rëndësishme për liberalizimin e vizave, përkrahje e cila është ofruar në kontinuitet nga Çekia.

/Epoka e re/