Ministrja e Bujqësisë, Pylltarisë dhe Zhvillimit Rural, Dijana Zhiviq, ka pritur në takim përfaqësuesit e Odës Afariste të Kosovës, ku kanë diskutuar lidhur me kërkesat e odës për ndryshimin e legjislacionit që ka të bëjë me shfrytëzimin e tokave pyjore.

Më këtë rast, ajo është zotuar se do të angazhohet për mbështetjen e afaristëve të Kosovës në ushtrimin e veprimtarive të tyre ekonomike, të cilat sipas saj ndikojnë edhe në zhvillimin ekonomik të vendit dhe krijimin e vendeve të reja të punës.

Nga ana tjetër, përfaqësuesit e Odës Afariste të Kosovës kanë kërkuar nga ministrja Zhiviq që të rishikohen afatet kohore të dhënies së tokave pyjore në shfrytëzim për ushtrimin e veprimtarive të tyre ekonomike, si dhe të rishikohen tarifat të cilat duhet të paguhen nga operatorët ekonomik, të cilët i shfrytëzojnë tokat pyjore përmes qiramarrjes.

Gjatë këtij takimi, ministrja Zhiviq ka theksuar se shumë shpejt do ta procedojnë edhe Projektligjin e ri për pyje për shqyrtim dhe miratim, i cili do ta rregullojë në mënyrë më adekuate edhe shfrytëzimin e qëndrueshëm të tokave pyjore.

/Epoka e re/