Tjetër zhgënjim për kampionët e Denverit, që në fushën e tyre u mundën me rezultat 106-80 nga Minnesota. Kjo e fundit i fitoi të dyja takimet jashtë fushe dhe tashmë udhëheq 2-0 serinë e gjysmëfinaleve të “play-off” në Konferencën e Perëndimit.

Ndeshje e komanduar nga miqtë, ku Towns dhe Edwards realizuan nga 27 pikë secili për Minnesotan. Vendimtar edhe stoli i ekipit mik, nga ku erdhën 37 pikë. Për Denverin zhgënjyen lojtarët “big”, me Gordon që realizoi 20 pikë e Jokiq vetëm 16 pikë.

Ka filluar seria e gjysmëfinaleve edhe në Konferencën e Lindjes, ku New York mundi me shifrat 121-117 Indianan dhe udhëheq 1-0 me ndeshje. Të gjithë titullarët e ekipit nju-jorkez realizuan mbi 13 pikë, ku shkëlqeu Jalen Brunson me 43 pikë.

Konferenca e Lindjes – Gjysmëfinale “play-off”

New York – Indiana         121-117 (1-0)
Boston – Cleveland

Konferenca e Perëndimit – Gjysmëfinale “play-off”

Denver – Minnesota         80-106 (0-2)
Oklahoma – Dallas