Komisioni për Ekonomi, Industri, Ndërmarrësi dhe Tregti, ka miratuar projektligjin për kripto-asetet dhe për regjistrin e pronarëve përfitues.

Me këtë rast, shefja e deputetëve të Vetëvendosjes, anëtare e këtij komisioni, Mimoza Kusari-Lila, ka thënë se nëpërmjet të njëjtit do të nxitet inovacioni si dhe do të krijohen parametra të sigurisë për parandalimin e shpëlarjes së parasë, raporton “RTK”.

“Më në fund është finalizuar nisma e 6 deputetëve nënshkrues në draftimin e projektligjit i cili për herë të parë bënë rregullimin e tregtimit dhe posedimit për kripto-asetet. Si një ndër valutat më të reja, jemi munduar që të kemi një draft-ligj që nxit inovacionin dhe investimet por krijon edhe parametrat e sigurisë për parandalimin e shpëlarjes së parasë. Kemi pasur mbështetje edhe nga dy ekspertë të Këshillit të Evropës”, deklaroi ajo.