Drejtori i përgjithshëm i Shërbimit Spitalor dhe Klinik Universitar i Kosovës (ShSKUK), Elvir Azizi dhe ambasadori i Britanisë së Madhe  në Kosovë, Jonathan Hargreaves, kanë mirëpritur të hënën në QKUK ekipin e mjekëve kardiokirurgë dhe kardiologë të fëmijëve nga Turqia, në kuadër të misionit “Muntada Aid”.

Prezentë ishin edhe këshilltarja e kryeministrit të Kosovës, Elizabeth Gowing, dr. Ramush Bejiqi, drejtoresha e Klinikës së Pediatrisë, dr. Violeta Grajqevci, drejtoresha e Klinikës së Radiologjisë, Shkëndije Nuza dhe dr. Shpejtim Shurdhiqi, u.d. drejtor i Klinikës së Kardiokirurgjisë.

Ekipi i mjekëve nga Turqia do të realizojë intervenime kardiokirurgjike tek fëmijët me probleme në zemër dhe do bëjë ekzaminime kardiologjike.

Drejtori i ShSKUK-së, Elvir Azizi, ka falënderuar organizatën “Muntada Aid” dhe ambasadorin Hargreaves për mbështetjen, duke shtuar se ky mision është një mundësi e mirë që fëmijët e Kosovës të përfitojnë intervenime në zemër, pa pasur nevojë të dalin jashtë vendit.

Ndërsa ambasadori i Britanisë së Madhe, Jonathan Hargreaves është shprehur i lumtur që ky mision humanitar po realizohet dhe që po përfitojnë fëmijët e Kosovës.

Në emër të ekipit, ka folur dr. Ibrahim  Cansaran, i cili po ashtu, ka shprehur kënaqësinë që kanë mundësinë të ndihmojnë fëmijët e Kosovës.

Sipas tij, kjo është një mundësi e mirë që të  përfitojnë eksperiencë edhe stafi vendos i mjekëve dhe infermierëve.

Në përbërje të ekipi mjekësor ka mjek kardiologë, kardiokirurgë, anesteziologë, infermierë dhe teknik të anestezionit.  Misioni ka filluar të hënën dhe do të zgjasë 10 ditë.