Një ekip mjekësor nga Suedia, i përbërë nga kirurgë plastikë dhe anesteziologë, po qëndrojnë në QKUK dhe po trajtojnë pacientë, në bazë të një bashkëpunimi mes Qendrës Klinike Universitare të Kosovës dhe Qendrës Klinike Universitare të Linkoping të Suedisë, i cili ka nisur në vitin 2001.

Bashkë me kirurgët nga Kosova, në Klinikën e Kirurgjisë Plastike, këtë javë, kanë kryer tri operacione mikrokirurgjike, në bazë të planifikimeve të bëra.
Drejtori i Kirurgjisë Plastike në QKUK, dr. Zenë Buja, e vlerësoi lartë bashkëpunimin me kirurgët suedezë.

Përveç ndihmës profesionale, Buja ka theksuar se Suedia i ka furnizuar edhe me pajisje mjekësore.

“Bashkëpunimi me mjekët suedezë daton që nga viti 2001 është një bashkëpunim shumë i mirë, shumë i suksesshëm, për arsye se ky ekip i mjekëve suedezë na ka ndihmuar shumë, si në aspektin e ngritjes sonë profesionale, po ashtu na kanë ndihmuar edhe me pajisje mjekësore”, ka thënë Buja.

Erkki Torpilla, mjek nga Suedia, ndërkaq, foli për intervenimet kirurgjike dhe tregoi për aktivitetin e ekipit që drejton ai, me të cilën po qëndron në Kosovë që nga dita e hënë.

“Qëllimi dhe misioni ynë është që të japim përvojat tona, për kolegët tanë kirurgë plastikë. Fillimisht kemi bërë konsultime për vështirësitë rreth rasteve të operimeve plastike. Gjithashtu, kemi bërë shumë vizita dhe kemi dhënë rekomandime për kolegët tanë se si të veprohet ose jo. Kemi kryer operacione ku kemi menduar se ka përfitime në aspektin edukativ”, ka deklaruar Torpilla.

Mjekët nga Suedia do të qëndrojnë në Kosovë deri ditën e premte. Kjo qendër universitare ka pasur bashkëpunim edhe me klinikat e tjera të QKUK-së.

/Epoka e re/