Federata e Sindikatave të Shëndetësisë së Kosovës (FSShK) ka paralajmëruar se do të presin deri më datë 15 dhjetor lidhur me kërkesat e tyre për Ligjin e Pagave dhe më pas do të ndërmarrin veprime të organizuara sindikale.

Në reagimin e FSShK-së është thënë se masat radikale do të ndodhin pas 15 dhjetorit në rast se nuk reagon Qeveria Kurti.

Këto masa radikale përfshijnë ndërprerjen e punës në gjithë institucionet publike të Kosovës.

Reagimi i plotë i FSShK-së:

Sot në mbledhjen e Këshillit Drejtues të Federatës së Sindikatave të Shëndetësisë së Kosovës është diskutuar në lidhje me ecurinë e Grevave të organizuara ditë më parë si dhe çështjet e ngritura para qeverisë nga kjo federatë.

Këshilli Drejtues bën thirrje edhe njëherë që Ligji mbi Pagat të procedohet, miratohet dhe implementohet me buxhetin e vitit 2022.

Këshilli Drejtues i FSSHK unanimisht kërkon nga Qeveria e Republikës së Kosovës që nëse Ligji i Pagave nuk kalon të ketë rritje të pagave për të gjithë të punësuarit në sistemit shëndetësor në lartësi prej 50 për qind dhe kjo bazuar në faktin se nuk ka pasur rritje pagash që nga viti 2014.

Këshilli Drejtues i FSShK-së ia kujton gjendjen e rëndë të punëtorëve shëndetësorë si pasojë e inflacionit dhe shtrenjtimit të jetës, rritje kjo e cila do të ndikonte në zbutjen e kësaj gjendje,kjo rritje do të vlente deri në fillimin e implementimit të Ligjit të Pagave.

FSShK-ja deri me datën 15 dhjetor do të bisedojë me secilin anëtar të vet dhe njëkohësisht pret reflektim nga Qeveria për të cilën ka formuar një grup negociues, nëse edhe kjo nuk ndodh,FSSHK paralajmëron masa radikale sindikale, siç është ndërprerja e punës në të gjithë institucionet publike shëndetësore.

Mbesim me shpresë se qeveria do të reflektojë në të kundërtën për të gjitha pasojat e mundshme përgjegjësinë e bartë vet Qeveria e Republikës së Kosovës.

Me respekt,

Këshilli Drejtues i FSShK-së