Ministria e Kulturës, Rinisë dhe Sportit do ta themelojë grupin e punës për ndërtimin e Planit Emergjent për Kulturë, Rini dhe Sport, i cili përfshin masat e nevojshme për t’i ndihmuar dhe mbështetur sektorët që i mbulon MKRS-ja për ballafaqim me vështirësitë e krijuara nga efekti i pandemisë globale COVID-19.

Fokusi i punës së këtij grupi do jetë ngritja e programeve të reja për subvencionim të krijuesve, të rinjve dhe sportistëve individualë si dhe OJQ-ve dhe bizneseve në këta sektorë të cilat kanë nevojë për mbështetje, me qëllim të vijimësisë së punës.

Grupi i punës do t’i propozojë ministrit kriteret e reja për përfitim të fondeve konform pakos emergjente pas masave të Qeverisë së Republikës së Kosovës që kanë goditur rëndë edhe aktivitetet sportive, kulturore dhe artistike. Sipas pakos, për të ndihmuar këto kategori do të rritet për 5 milionë euro buxheti i Ministrisë së Kulturës, Rinisë dhe Sportit, shumë kjo që do të përdoret për subvencionim shtesë të shoqatave sportive e kulturore të vendit.

Pra, me caktimin e grantit prej 5 milionë eurosh dedikuar për MKRS-në, ministrja Dumoshi menjëherë ka ndërmarrë veprimet e duhura për themelimin e grupit punues për të ndihmuar sektorët e kulturës, rinisë, sportit e trashëgimisë.

Ministrja Dumoshi tha se është obligim që t’u gjenden pranë organizatave kulturore, rinore e sportive në këtë kohë të vështirë.