Ministrja e Mjedisit dhe Planifikimit Hapësinor  (MMPH), Albena Reshitaj, ka nënshkruar dy memorandume të enjten në Gjakovë.

Njëri memorandum është nënshkruar ndërmjet ministres Reshitaj dhe kryetarit të Gjakovës, Ardian Gjini dhe ka të bëjë me rregullimin e shtratit të lumit Krana me një vlerë prej 200 mijë eurosh.

“Kam kënaqësinë që sot ndodhem në Gjakovë për t’i konkretizuar projektet kapitale për qytetarët e kësaj komune. Ministria që unë drejtojë do ta mbështesë në vazhdimësi komunën e Gjakovës, kryetarin Gjini në realizimin e projekteve në fushën e mjedisit dhe planifikimit hapësinor”, ka deklaruar ministrja Reshitaj.

Lumenjtë e Kosovës, sipas ministres Reshitaj, janë pasuri që ne duhet t’i mirëmbajmë e të kujdesemi për ta. “MMPH-ja këtë vit do të bëjë aerofotografinë e tyre për të parë saktë dëmtimet dhe devijimet e shtretërve të lumenjve. Projekt ky që do të shoqërohet njëkohësisht me projektet tona për rregullimin e shtretërve të lumenjve në tërë territorin e Kosovës”, ka thënë Reshitaj.

Ndërkaq kryetari i Gjakovës, Ardian Gjini, ka falënderuar ministren Reshitaj për angazhimin e saj për t’i ndihmuar komunat me projekte të ndryshme në të mirë të mjedisit. Po ashtu të enjten në ambientet e komunës së Gjakovës është nënshkruar edhe memorandumi tjetër ndërmjet ministres Reshitaj dhe kryeshefit të KUR “Gjakova”, Ismet Ahmeti.

Me këtë memorandum MMPH-ja mbështet projektin për përfundimin e punimeve të ujësjellësit për 28 fshatra të komunës së Gjakovës në vlerë prej 200 mijë eurosh. “Qasja në ujë të pijshëm është e drejtë primare e qytetarëve, ky është misioni jonë që secila familje të gëzojë këtë të drejtë”, u shpreh ministrja Reshitaj.