Ministrja e Mjedisit dhe Planifikimit Hapësinor (MMPH), Albena Reshitaj, ka pritur të enjten në takim kryetarin e komunës se Deçanit, Bashkim Ramosaj, me të cilin biseduan për realizimin e projekteve të përbashkëta në fushën e mjedisit dhe planifikimit hapësinor.

Në takim ministrja Reshitaj duke cilësuar Deçanin si një vend turistik ka prezantuar projektet e ministrisë që do të realizohen në bashkëpunim me komunën si: Ndërtimi i kanalizimit në fshatin Irzniq në Lagjen “Mushkolaj”, në vlerë prej 100 mijë euro, rregullimi i shtratit të Lumëbardhit në Deçan, në vlerë prej 500 mijë eurosh, ndërtimi i ujësjellësit në Strellc të Deçanit, në vlerë prej 320 mijë eurosh.

Reshitaj ka përmendur edhe projektet që janë duke vazhduar: Ndërtimi i kanalizimit në Deçan, në vlerë prej 60 mijë eurosh, rregullimi i hapësirës gjelbëruese tek Verrat e Llukës, në vlerë prej 50 mijë eurosh si dhe ujësjellësi për 10 fshatra dhe kyçja në burime të reja në Deçan, ku për vitin 2018 janë ndarë 50 mijë euro.

Kryetari Ramosaj ka falënderuar ministren për ndihmën e dhënë në realizimin e këtyre projekteve, duke vlerësuar punën e saj në përmirësimin e gjendjes se mjedisit dhe përkrahjes që ajo po i jep komunave.