Kryetari i Partisë Socialdemokrate (PSD), Dardan Molliqaj, ka thënë se kryeministri Albin është duke mashtruar me reciprocitetin dhe se po dëshiron konflikt.

“Sfondi prej nga kjo qeveri po performon parimësinë është i natyrës konfliktuoze. E konfliktet e kontrolluara janë mashtrime me pasoja të pakontrollueshme. Pasiguria e tillë lëndon qytetarët, ngado”, ka shkruar Molliqaj në llogarinë e vet në Facebook”.

Postimi i plotë:

Fetishizimi i reciprocitetit

Kur jemi te reciprociteti me Serbinë, pse jo në fushën e tregtisë? Sepse më vështirë? Sepse aty preken interesa më të mëdha? Sikur ta kishin për qëllim reciprocitetin, atë do ta manifestonin edhe në fushat tjera shumë më vitale. Bilancin tregtar e kemi negativ. Importi nga Serbia vetëm sa është rritur.

Sfondi prej nga kjo qeveri po performon parimësinë është i natyrës konfliktuoze. E konfliktet e kontrolluara janë mashtrime me pasoja të pakontrollueshme. Pasiguria e tillë lëndon qytetarët, ngado.

Kryeministri tash ka vendosur që ta thjeshtëzojë nocionin e sovranitetit. E ka varur për dokumente kalimi, targash, e nesër kush e di në çka! Por, marrëveshje përfundimtare nuk ka. Të paktën me këtë qasje. E për keqardhje është edhe opozita parlamentare, duke e mbështetur pa kritikë dhe të zënë në faj, një udhë pa krye që sjell rreziqe.

Ka zgjedhur elemente të vogla (në krahasim me madhësinë e marrëveshjes përfundimtare) për ta ushtruar pushtetin, kur dihet se kjo çështje ka nyjën të lidhur në dialogun.

Prej nga ky zell për respektim afatesh në vlugun e bisedimeve? A e forcon ky hap pozicionin e Kosovës në negociata, apo pushtetin e Kurtit brenda?

Kosova e vogël për ambiciet e mëdha të Kurtit.