Kryetari i Partisë Socialdemokrate (PSD), Dardan Molliqaj, ka bërë thirrje për protesta kundër Asociacionit të komunave me shumicë serbe.

Sipas Molliqajt, marrëveshja e Brukselit pritet të jetë pa njohje dhe me Asociacionin në qendër.

“Askush nuk ka mandat për asociacionin. Rezistenca ishte shoqërore. Nuk jemi angazhuar për t’i ndërruar fytyrat që e zbatojnë asociacionin. Nëse ka ndodhur që pushteti është tjetërsuar aq pakthyeshëm, atëherë zgjedhje ose referendum. Përndryshe, protesta në rrugë. Kundër qeverisë sepse kundër asociacionit”, ka shkruar Molliqaj në “Facebook”.

Postimi i plotë i Molliqajt:

THIRRJE

Protesta kundër Qeverisë sepse kundër asociacionit.

Aktivistë e qytetarë,

Ju që mbushët sheshet me protesta dhe bllokuat asociacionin;

Ju që organizuat mijëra tubime kundër asociacionit;

Ju që shkelët me këmbë çdo pëllëmbë të Kosovës për t’i mbledhur 200 mijë nënshkrime;

Ju 200 mijë qytetarë që me vetëdije e vullnet firmosët kundër ndarjes etnike;

Ju që denjuat burgun dhe sollët protestën brenda Kuvendit;

E di që shumë prej jush keni besuar vërtet që Kurti nuk e bën asociacionin; shumë keni vlerësuar që kritika jonë është subjektive dhe lidhet me “hesapet” tona; tashmë s’ka vlerësime as analiza; ora kritike po vjen, marrëveshja që na pret në Bruksel është pa njohje dhe me asociacion në qendër; aty është orari dhe mënyra e zbatimit.

Askush nuk ka mandat për asociacionin. Rezistenca ishte shoqërore. Nuk jemi angazhuar për t’i ndërruar fytyrat që e zbatojnë asociacionin. Nëse ka ndodhur që pushteti është tjetërsuar aq pakthyeshëm, atëherë zgjedhje ose referendum. Përndryshe, protesta në rrugë. Kundër qeverisë sepse kundër asociacionit.