Seria A mund të humbasë një tjetër yll. Bëhet fjalë për Alvaro Moratën, i cili në orët e fundit thuhet se është në negociata të avancuara me Galatasarayn.

Fabrizio Romano në kanalet e tij sociale, shpjegon se si kontaktet janë edhe në një fazë të avancuar dhe gati për finalizim. Me pak fjalë, operacioni duket se është shumë afër tymit të bardhë, ku Morata është gati të marrë një fluturim drejt Turqisë në orët e ardhshme.

Portali spanjoll Relevo shton se mbetet të përcaktohet formula e operacionit. Në tavolinë është edhe mundësia e huazimit me opsion blerjeje në fund të sezonit, por edhe një transferim i përhershëm.

Me fanellën e Milanit, që nga ardhja e tij në verë, sulmuesi spanjoll ka marrë pjesë në 25 ndeshje në të gjitha kompeticionet, duke shënuar 6 gola, ndërkohë që ndihmoi ekipin të fitonte Superkupën e Italisë.