Ish-kryeministri i Kosovës, Avdullah Hoti, ia ka rekomanduar qeverisë Kurti katër veprimet që sipas tij e zgjidhin situatën aktuale në veri të vendit.

Sipas Hotit, qeveria duhet të heq barrikadat në bashkëpunim me KFOR-in.

Ai në “Facebook” ka shkruar të kërkohet nga BE-ja dhe ShBA-ja që të bëhet presion tek Serbia që të mos pengohen kosovarët që kalojnë nëpër Serbi.

Po ashtu, Hoti ka rekomanduar qeveritarët të mos përmendin luftë dhe konflikte.

“Luftën e kemi paguar shtrenjtë, por e kemi fituar me ndihmën e miqve. Rreziku është të humbim në paqe për shkak të humbjes së mbështetjes nga miqtë tanë”, ka shkruar Hoti.

Postimi i plotë i Hotit:

Veprimet që nxjerrin Kosovën nga kjo kurth e Serbisë:

Hiqni barrikadat në veri në bashkëpunim me KFOR-in. I keni lënë të zënë vend tepër gjatë.

Kërkoni me ngulm nga BE-ja dhe ShBA-ja të bëjnë presion tek Serbia të mos pengohen dhe të mos rrezikohen qytetarët tanë që kalojnë nëpër Serbi.

Ruajeni paqen fuqishëm. Tregoni gatishmëri për dialog dhe zgjidhje paqësore. Dëgjoni këshillat e miqve për veprimet që duhet ndërmarrë në kuadër të dialogut.

Mos përmendni luftë e konflikte. Luftën e kemi paguar shtrenjtë, por e kemi fituar me ndihmën e miqve. Rreziku është të humbim në paqe për shkak të humbjes së mbështetjes nga miqtë tanë.