Prishtina tashmë gjendet në ditën e dytë të karantinës. Sot në të gjitha postblloqet e kryeqytetit gjenden njësitet e veçanta të Policisë së Kosovës të cilat po e mbikëqyrin situatën. Por, ka shumë qytetarë që tashmë ia kanë mësyrë Prishtinës për të punuar e që s’po mund të hyjnë në kryeqytet.

Për të hyrë në Prishtinë duhet një leje e veçantë e cila merret në Ministrinë e Punëve të Brendshme. Kështu të paktën thotë drejtori i Inspeksionit në Prishtinë, Adonis Tahiri.

“Lejet duhet të jenë të veçanta, të merren në Ministrinë e Punëve të Brendshme dhe ATK. Nëse nuk i kanë lejet e veçanta, nuk mund të hyjnë në kryeqytet. Ministria e Punëve të Brendshme i kanë publikuar emailat ku mund të drejtohen qytetarët”, tha Tahiri.

E Ministria e Punëve të Brendshme ende nuk publikuar format e reja të lëvizjes me të cilat qytetarët do të mund që të futen në Prishtinë, aty ku edhe punojnë.