Analisti Shenoll Muharremi ka reaguar pas publikimit të një letre nga Sekretariati i Komunitetit të Energjisë, e cila mbështet Bordin e Zyrës së Rregullatorit për Energji (ZRRE) në procesin e rishikimit tarifor. Ai shpreh skepticizëm mbi autonominë e ZRRE-së, duke vënë në dyshim pavarësinë e saj nga politika.

Sipas Muharremit, rregullatori është larg standardeve evropiane dhe nuk mjafton të citojë direktivat, por duhet t’i zbatojë ato në praktikë. Ai akuzon ZRRE-në për ndikim politik dhe mungesë transparence, duke rikujtuar premtimet e mëparshme për mosrritje çmimesh dhe më pas propozimin për shtrenjtim të rrymës.

Në reagimin e tij, ai gjithashtu kritikon mënyrën se si rregullatori ka menaxhuar komunikimin me publikun dhe vendimmarrjen për tarifat e energjisë, duke theksuar se llogaridhënia duhet t’i bëhet qytetarëve të Kosovës, e jo Sekretariatit në Vjenë.

Reagimi i plotë:

E paska publiku ZRRE një letër nga “Sekretariati i Komunitetit të Energjisë” ku e mbështetë Bordin e Zyrës së Rregullatorit për Energji (ZRRE) në këtë proces tarifor. Në letër i paskan thënë që Rregullatori duhet me qenë autonom. Pajtohem plotësisht, po a është vërtet autonom ky rregullator?

A ju kujtohet kur, gjatë fushatës, patën reaguar dhe thanë “nuk ka rritje çmimesh”? Dmth, i kanë ba një ‘argat’ politikës, e pastaj na ‘futën’ përsëri me propozim për rritje. A janë autonom apo jo?

E vitin e kaluar, kanë propozu një zbritje të lehtë të çmimit, se ka qenë vit parazgjedhor, ndoshta i kanë ndihmu pak politikanët me fitu vota.

Në një prononcim në mediat vendore, ZRRE tha që 90% e rritjes së konsumit të energjisë vjen nga blerja e pajisjeve eficiente. Menjëherë intervistën e radhës e mohuan, mesiguri ju kanë thënë nga Ministria e Ekonomisë “çka po boni ashtu?! A e dini që na i kemi shti me i ble paisjet eficiente e tash po jau rritim çmimin!”

Ky rregullator është larg prej standardeve europiane. Nuk mjafton me na citu direktivat, duhet me i zbatu ato! E mos të flasim për transparencë dhe bashkëpunim që paska kërku kjo letër e sekretariatit.
Këta janë ata që kanë dalë publikisht dhe kanë thënë “punë e kryme është, shihemi vitin tjetër.” Kjo ka ndodhë ende pa përfundu procesi ‘konsultativ”. Ju i keni komentet e bllokuara ne faqen tuaj te facebook. Nuk i keni marrë parasyesh reagimet e konsumatorëve vitet e kaluara.

Mos na lodhni me standarde europiane, se ju duhet me qenë të parët që i respektoni ato. Askush nuk po ju pengon me bë punë të mirë e me marrë vendime të drejta sipas ligjit.

Gjithashtu, këshillat e atyre që nuk i bartin pasojat e vendimeve, duhet me i kuptu me kujdes. Juve nuk ju kanë zgjedhë në Vjenë, po në Kosovë edhe po vendosni për kosovarët. Kështu që neve keni me na dhënë llogari, jo Sekretariatit në Vjenë.