Juventusi u turpërua në Ligën e Kampionëve, duke u eliminuar nga PSV-ja pas kohës shtesë. Serie A shpresonte të shkonte me pesë ekipe sezonin e ardhshëm në Ligën e Kampionëve, por eliminimi i tre ekipeve që në fazën e Ligës e bën thuajse të pamundur këtë përfundim.

Trajneri i bardhezinjve, Thiago Motta nuk e bën dramë këtë eliminim.

“PSV-ja nuk e dëshironte më shumë kualifikimin se sa ne. Pas golit të barazimit, ata shtynë më shumë, krijuan më shumë, ishin superior. As ne nuk qëndruam pasiv, kishim rastet tona, si me Vlahoviq në fund. Në përgjithësi ishte një ndeshje e hapur dhe e luftuar. Gjithsesi, tani është koha të shohim përpara, që nga kjo e diele kemi një ndeshje të rëndësishme në kampionat kundër Cagliarit. Në Ligën e Kampionëve ka një nivel të lartë, ne hasëm shumë vështirësi. Nuk na mbetet gjë tjetër vetëm të menaxhojmë këtë humbje. Na vjen shumë keq për këtë eliminim, por dhe kjo është pjesë e lojës, e punës tonë”, u shpreh Motta.