Verdhekuqtë u mposhtën me rezultatin 5-2 nga Real Betis në një sfidë që vetëm si miqësore nuk dukej pasi tensioni ishte i lartë brenda dhe jashtë fushe me nervat e protagonistëve që kapën maksimumin.

Në Benito Villamarin, Mourinho e nisi sfidën me Edin Dzekon që po përflitet për një kalim te Interi në stol dhe blerjen më të fundit Shomurodov që nga minuta e parë në formacion. Sfida u zhbllokua shumë shpejt me Rodrin që kaloi në epërsi Real Betisin pas vetëm 4 minutash lojë. Megjithatë në minutën e 27-të skenën e mori Shomurodov që i asistuar nga Lorenzo Pellegrini realizoi golin e tij të parë me fanellën verdhekuqe. Por barazimi zgjati pak pasi Nabil Fekir shënoi të dytin për andaluzianët në minutën e 30-të duke e çuar Betisin në epërsi në pushim.

Pjesa e dytë nisi mirë për Romën që barazoi menjëherë shifrat me mbrojtësin Gianluca Mancini pas traversës së goditur nga Shomurodov. Por ashtu si në pjesën e parë edhe në fraksionin e dytë Betis e rigjeti shpejt epërsinë pikërisht me Morenon në minutën e 58-të, moment kur u tensionuan edhe gjakrat në fushë.

Mbrojtësi i Betis e devijoi topin me dorë në çastin kur e depozitoi në rrjetë dhe këtu nisën edhe protestat e italianëve me Pellegrinin që mori kartonin e dytë të verdhë dhe menjëherë pas tij u ndëshkua edhe Jose Mourinho për protesta. Roma e mbylli ndeshjen me 8 lojtarë pasi minuta më vonë u ndëshkuan edhe Gianluca Mancini e Rick Karsdorp me kartonë të kuqë, ndërsa në superioritet numerik Betis ja doli të shënonte edhe dy herë të tjera me Cristian Tellon dhe Robert për shifrat finale 5-2.

Top Channel