Kryetari i Komunës së Prishtinës, Shpend Ahmeti, ka njoftuar se ka pranuar vendimin nga Ministria e Punëve të Brendshme dhe Administratës Publike (MPBAP) për ndërprerjen e transportit publik në tërë vendin.

Ahmeti ka thënë se MPBAP-ja këtë vendim e ka marrë duke mos u konsultuar fare me Komunën e Prishtinës e as me komunat tjera.

“Sapo pranova vendimin e Ministrisë së Punëve të Brendshme për ndërprerjen e transportit publik në krejt Republikën e Kosovës, menjëherë. Përderisa kemi qenë përkrahës kryesorë të masave restriktive, dhe po ashtu kemi mbështetur secilin vendim të nivelit qendror, ky vendim është marr pa asnjë konsultim, as edhe 30 sekondësh me Komunën e Prishtinës e as me komunat tjera”, ka shkruar Ahmeti në llogarinë e vet në “Facebook”.

Ahmeti ka thënë se përveç kostos, ky vendim ka ndikim edhe në qarkullimin e njerëzve të cilët nuk kanë mundësi tjetër udhëtimi.

“Ky vendim përveç kostos, ka ndikim në qarkullimin e njerëzve që nuk kanë mundësi tjetër, duke ditur që në Prishtinë ende funksionojnë institucionet publike, institucionet shëndetësore e edhe disa kompani. Ndoshta ky vendim do të ishte i domosdoshëm, por ndërprerja e menjëhershme pa kurfarë mundësie që të planifikojmë më mirë edhe si logjistikë edhe si kosto nuk ka nevojë të behet”, ka shkruar Ahmeti.

Më tutje, Ahmeti ka theksuar se koordinimi me të gjitha institucionet në këtë kohë është i domosdoshëm.

“Koordinimi me krejt institucionet është i domosdoshëm. Jemi të gjithë ushtarë në një betejë. P.S. besoj qe Qeveria do të shtojë edhe disa miliona subvencione për kompanitë e transportit publik në krejt Kosovën”, ka shkruar Ahmeti.