Ministria e Punëve të Jashtme dhe Diasporës (MPJD) ka reaguar pas lajmeve të mediave ruse dhe deklaratave të kryediplomatit të Rusisë, Sergei Lavrov se “Kosova po dërgon mercenarë në Ukrainë”.

MPJD-ja i ka hedhur poshtë pretendimet e agjencisë “TASS” dhe ministrit të Jashtëm rus Lavrov.

“Ministria e Punëve të Jashtme dhe Diasporës e Republikës së Kosovës hedh poshtë në mënyrë kategorike si të pavërtetë dhe tendencioz çdo pretendim të agjencisë të lajmeve ruse TASS dhe të ministrit të Jashtëm rus, Sergei Lavrov, se kinse ‘Kosova dhe disa pjesë tjera të Ballkanit Perëndimor po bëhen terren për krimin…’”, është thënë në reagimin e MPJD-së.

Sipas MPJD-së, deklaratat e Lavrovit janë pjesë të fushatës së egër të propagandës ruse.

“Bëjmë me dije ministrit rus Lavrov dhe agjencisë e lajmeve ruse ‘TASS’, se Republika e Kosovës e ka të ndaluar me ligj (NR.05/L-002 ) pjesëmarrjen e qytetarëve të saj në luftëra jashtë vendit dhe ky ligj parasheh dënime të rrepta për secilin qytetar të saj që mund të jetë pjesë e veprimeve të tilla. MPJD vlerëson se deklaratat e agjencisë së lajmeve ‘TASS’ dhe ministrit Lavrov janë pjesë e një fushate të egër të propagandës ruse që kanë për qëllim tërheqjen e vëmendjes së gjithë botës demokratike nga ankthi që po krijon politika hegjemoniste dhe e diktatit rus mbi të drejtat e popujve për jetë të lirë e sovrane”, është thënë në reagim.

Më tutje, MPJD-ja ka thënë se Rusia dëshiron që kësisoj ta tensionojë situatën edhe në Kosovë dhe në gjithë rajonin përmes Serbisë.

“Kjo fushatë e egër ruse kundër Kosovës dhe vendeve tjera të Ballkanit Perëndimor, ndër të tjera, ka për qëllim edhe tensionimin e situatës në Kosovë dhe më gjerë në rajon përmes satelitit rus në Ballkan, Serbisë. MPJD shpreh solidaritetin e plotë të popullit të Kosovës me popullin e Ukrainës për të drejtën për jetë të lirë e sovrane në shtetin e tyre. Republika e Kosovës bën thirrje për ulje të tensionit dhe shmangie të konfliktit, i cili mund të marrë përmasa të paparashikueshme”, është thënë në reagimin e MPJD-së.

MPJD-ja ka theksuar se Kosova i bashkohet botës demokratike në dënimin e politikës hegjemoniste dhe ekspansioniste ruse në dëm të shtetit sovran e të pavarur të Ukrainës.