Ministria e Tregtisë dhe Industrisë përmes Agjencisë për Investime dhe Përkrahjen e Ndërmarrjeve në Kosovë (KIESA), ka organizuar të martën konferencën informuese për eksport.

Në këtë ngjarje, pos përfaqësuesve të MTI/KIESA-s, morën pjesë edhe përfaqësues të shoqatave dhe bizneseve vendore- prodhuese nga sektorë të ndryshëm.

Durim Limaj, këshilltar i lartë politik dhe shef i kabinetit të ministrit Endrit Shala, iu drejtua të pranishmëve me një fjalë hyrëse duke i informuar me prioritetet dhe përkrahjen e MTI-së.

“MTI-ja synon të rrisë konkurrueshmërinë e ekonomisë kosovare duke e bërë atë më tërheqëse për investitorët e huaj, por njëherësh mbështet zhvillimin e ndërmarrjeve të vogla dhe të mesme dhe eksportet kosovare përmes aktiviteteve promovuese jashtë vendit”, ka thënë këshilltari Limaj.

Me këtë rast, Limaj ka folur edhe rreth aktiviteteve promovuese që ka realizuar MTI-ja, si dhe i ka ftuar të pranishmit që të japin idetë dhe sugjerimet e tyre rreth aktiviteteve që planifikohen të realizohen për vitin në vijim.

Ndër tjera, ai ka kërkuar nga prodhuesit që të fokusohen në kualitetin e prodhimeve të tyre për të qenë sa më të pranishëm në tregjet vendore dhe ndërkombëtare.

Ndërsa, Arbër Muhaxheri, drejtor i Drejtoratit për Promovimin e Sektorit Privat në KIESA, ka prezantuar shërbimet e agjencisë në funksion të promovimit dhe zhvillimit ekonomik.

Edhe drejtoresha e Departamentit të Tregtisë, Sytrime Dervisholli, i ka njoftuar të pranishmit rreth marrëveshjeve të tregtisë së lirë, në fokus të veçantë për ato që ndërlidhen me MSA-në.

Gjatë konferencës u zhvilluan diskutime rreth rezultateve të panaireve të realizuara nga MTI/KIESA, si dhe rreth koordinimit të aktiviteteve për të ardhmen.