Ministri i Kulturës, Rinisë dhe Sportit, Hajrulla Çeku të enjten bëri të ditur se është përzgjedhur koncepti ideor për stadiumin e Suharekës dhe se tashmë ka filluar hartimi i projektit zbatues dhe vitin e ardhshëm do të nisin procedurat e prokurimit për punimet në këtë impiant sportiv.

Një lajm të tillë e ka mirëpritur kryetari i kësaj komune, Bali Muharremaj, i cili në “Facebook” ka shkruar duke thënë se ky qytet po bëhet me stadium të ri të kategorisë 2, me kapacitet 6518 ulëse, që plotëson standardet më të larta ndërkombëtar.

“Ky është lajm i mirë për Komunën e Suharekës. Po bëhemi  me stadium të ri të kategorisë 2, me kapacitet 6518 ulëse, që plotëson standardet më të larta ndërkombëtare, sipas njoftimit nga Ministria e Kulturës, Rinisë dhe Sportit. Komuna jonë ka bashkëpunuar vazhdimisht, duke dhënë kontribut edhe në ndarjen e parcelës prej 13 hektarëve. Mirëpresim secilin investim që ndodhë në komunën tonë”, ka shkruar Muharremaj.