Një debat që po vazhdon të zhvillohet ende është ai se “cili klub është më i madhi në futbollin kosovar”. Analisti nga emisioni “Favorit”, Ismet Munishi, vazhdon të këmbëngul se Prishtina është klubi më i madh, kurse pas saj renditen Trepça, Liria dhe Vëllaznimi.

Munishi vlerëson arritjet e Ballkanit, veçanërisht në garat evropiane, por që sipas tij, duhet ende punë për të arritur te Prishtina e të tjerat.

“Fillimisht kur jemi në pushim të garave, duhet prekur disa tema që janë interesante për publikun, për trashëgimtarët e tonë… duke i shtjelluar këto ndeshje ngritën debate në publik. Prishtina, Trepça, Vëllaznimi dhe Liria janë klubet më të mëdha. Dikur rivaliteti dhe organizimi i klubeve ishte si i Real Madridit e Barcelonës. Prishtina është Real Madridi, Trepça është Barcelona”, tha fillimisht trajneri kosovar, që gjithashtu theksoi se “para 40-50 vjetëve klubet kanë pasur organizim e infrastrukturë më të mirë se tani”.

“Ballkani është si Girona, po luan mirë, por i vyen kohë të arrijë te Real Madridi dhe Barcelona (Prishtina dhe Trepça). Mund të themi me sukseset që ka arritur në Evropë, por jo me tituj se Prishtina e Besa kanë më shumë, është storje suksesi. Mirëpo, kur flasim për traditën dhe historinë, Prishtina, Trepça, Liria e Vëllaznimi janë katërshja e madhe e futbollit. Prishtina doli tash nga problemet, por është për të ardhur keq që Lirinë e kemi me probleme, e Trepçën dhe Vëllaznimin në Ligën e Parë”, shpjegoi Munishi.

“Nuk kemi futboll të fortë dhe rivalitet. Nuk kemi shikues, ka vetëm ka 50 shikues në ndeshje. Prej faktorëve kryesorë që nuk ka shikues është rivaliteti”, deklaroi Munishi.

Emisioni “Favorit” transmetohet çdo të diel në T7, si dhe në kanalin zyrtar të televizionit në “YouTube”.