Në 15 muaj, tenisti britanik Andy Murray ka luajtur vetëm 13 ndeshje, duke fituar 7 e humbur 6, aktivitet që nis nga Wimbledon 2017 e mbyllet në Shenzen 2018.

Shumë pak një tenist që dy vite më parë ishte numri 1 në botë. Në mes të kësaj periudhe edhe një operacion në shpinë. Por kohët e fundit Murray duket se ka vendosur të rinisë gjithçka nga e para dhe të rinisë nga “A”-ja vitin 2019, duke debutuar në turneun e Brisbane, raporton “Telesport”.

Objektivi kryesor i tenistit britanik është shëndeti dhe më pas rezultatet në fushë. “Çdo ditë ndihem më mirë. Ky ka qenë një vit i vështirë por jam gati të rinis gjithçka nga e para. Tani do të nis përgatitjet në Miami, ku do të shfrytëzoj kushtet klimaterike për t’u përgatitur ashtu si duhet. Dua që kur të nisë sezoni i ri të jem në formën optimale dhe të bëj një paraqitje të mirë aty dhe në Australian Open”, ka thënë Andy Murray.