Eksperti i sigurisë, Agim Musliu ka deklaruar se Serbia tentoi që përmes postierëve shqiptarë të përhapë propagandë në Kosovë.

Eksperti i Sigurisë, Agim Musliu ka njoftuar se këto ditë i kanë ardhur disa dezinformata nga disa persona që burimin e kanë në Beogradin zyrtar, që përmes “postierëve shqiptarë”  kanë provuar të shpërndajnë “të ashtuquajtura dokumente komprometuese për figura të rëndësishme të Kosovës”.

Në një postim në Facebook, Musliu ka thënë se dokumentet kanë qenë në gjuhën serbe dhe te shkruara me tendencë, ku shihet dukshëm qëllimi i dëmtimit të Kosovës.

Ai ka thënë se në institutin Octopus njihen metodat dhe qëllimet e operimit të serbëve nga Beogradi dhe se nuk bien pre e këtyre mashtrimeve.

Ai ka thënë se ka informata që “postierët shqiptarë” të Beogradit po provojnë që materiale të tilla t’ua shpërndajnë adresave të tjera, si në media, ashtu edhe te disa organizata.

“Normalisht që ne në institutin OCTOPUS e njohim edhe qëllimin edhe metodën e operimit të serbëve nga Beogradi, dhe nuk mund të bijmë pre e këtyre mashtrimeve, por jemi shqetësuar sepse kemi të dhëna se “postierët shqiptarë” të Beogradit po provojnë që materiale të tilla t’ua shpërndajnë adresave të tjera, si në media, ashtu edhe te disa organizata. Instituti OCTOPUS do të përpiqet që në radhë të parë, të kontribuojë për sigurinë dhe do ta ruajë integritetin profesional, e më vonë do të kujdesemi për të ashtuquajturën “Liri e shprehjes”, përmes së cilës shpesh përhapet municion propagandistik”, ka shkruar tutje Musliu.