Lideri i LDK-së, Isa Mustafa, ka bërë me dije se bashkë me kandidaten e LDK-së për kryeministre, Vjosa Osmani, do ta takoj liderin e Lëvizjes  Vetëvendosje, Albin Kurti, i cili i ka fituar zgjedhjet e 6 tetorit.

Në profilin e tij në “Facebook”, ai ka shkruar  se me Kurtin do të vazhdojë aty ku e ka lënë para fillimit të procesit zgjedhor.

Postimi i plotë i Mustafës:

Qytetarë të nderuar,

Në zgjedhjet e 6 tetorit LDK mori përkrahje të gjerë nga qytetarët tanë. Qytetarët ndëshkuan ata që qeverisën keq.

Në një garë tepër të ngushtë, 50:50, fituesi, LDK apo VV, do të dihet përfundimisht pasi të përfundon numërimi i plotë i të gjitha votave.

Këto ditë, së bashku me kandidaten tonë për kryeministre, znj. Vjosa Osmani, do të takohemi me Kryetarin e Lëvizjes Vetëvendosje, z. Kurti për të vlerësuar procesin zgjedhor dhe mundësitë e bashkëqeverisjes. Do të vazhdojmë aty ku e kemi lënë para fillimit të procesit zgjedhor, duke respektuar vullnetin e qytetarëve të shprehur me votë të lirë në një proces demokratik zgjedhor por edhe interesin e LDK-së. IM