Deputeti i LDK-së, Fatmir Rexhepi, në Interaktiv të KTV-së ka kritikuar kreun e LDK-së, Isa Mustafa, për largimin nga strukturat e partisë të Vjosa Osmanit dhe të tij.

Përjashtimin nga strukturat e LDK-së ai e quan gabimin më të madh të partisë.  “Mendoj se ky ishte gabimi më i madh i lidershipit të partisë dhe i kryesisë, atyre anëtarëve që kanë marrë pjesë. Unë besoj se të gjithë nuk kanë marrë pjesë në atë vendim. Vendimi ka qenë me SMS. Ishte një gabim që nuk iu ka dashtë kryetarit Mustafa, sepse unë kam një respekt të madh për të pavarësisht kjo që ka ndodhur. Për këtë mendoj se ka bërë një gabim. Kërkesa ka qenë e tij. Edhe nëse nuk e kam votuar qeverinë, unë e kam vlerësuar se nuk ka qenë në frymën e Këshillit të Përgjithshëm, meqenëse i kanë thyer këto kritere, vota ime ka qenë neutrale. Kanë gabuar edhe me Vjosën, edhe me mua”, ka thënë ai.

Më tutje, ai ka thënë se një veprim i tillë i Mustafës nuk i ka bërë nder LDK-së. “Edhe lideri që ka ardhur që 15 vjet apo më pak në LDK mendoj se është lëshim shumë i madh sepse kontributet tona janë shumë të mëdha. Ne kemi punuar që nga themelimi me presidentin Rugova, plus kam qenë një nga bashkëpunëtorët e presidentit. Nuk është mirë të bëhen kësi veprime, thejsht me e shpreh një revoltë. T’i kishim debatuar në Këshillin e Përgjithshëm atëherë do të ishte krejt diçka tjetër. Ajo nuk i ka bërë nder LDK-së. Ne jemi takuar edhe dhjetë ditë më herët para asaj mbledhje”, ka thënë Rexhepi. “Është bërë një mënyrë, fundjavë, e shtunë, për mua ka qenë e pakuptimtë dhe me tendencë. Ka mundur të trajtohej sy më sy, jo në mënyrë ilegale. Për këtë rast nuk pajtohem. Ka bërë gabim të rëndë. Nuk ka pas nevojë”.

Sipas tij, ata i kanë shkelur të gjitha parimet, me formatin e qeverisë dhe propozimet që i kanë bërë. “Kanë gabuar rëndë, prandaj nuk e kanë pasur votën time. Por, kjo nuk i jep të drejtë liderit të partisë për t’i marrë ato masa. Me format më të mirë, me njerëz me kontribute më të mëdha”, shprehet ai.

Ai thotë se askush nuk mund ta largojë nga Lidhja Demokratike e Kosovës. “Unë nuk besoj që mund të më largojnë nga Këshilli i Përgjithshëm. Nuk ka shanse të më largojnë nga Lidhja Demokratike. Më së pari mund ta largojnë veten, edhe kryetari edhe dikush tjetër që është merakli në ato punë, sesa unë të largohem”, ka thënë ai.

Rexhepi ka thënë se çmimin e largimit të Vjosa Osmanit do ta paguajnë në zgjedhje. Sipas tij, çdo gjë e ka çmimin e vet dhe elektorati është ai i cili më së miri e vlerëson çdo veprim dhe individ.