Kryetari i Lidhjes Demokratike të Kosovës (LDK), Isa Mustafa, i është kundërpërgjigjur liderit të Partisë Demokratike të Kosovës (PDK), Kadri Veselit, i cili ka thënë se “populli duhet të zgjedhë midis një qeverie që e udhëheqë PDK-ja me të si kryeministër, e cila do të forcojë partneritetin me miqtë amerikan,ë apo një koalicion i izolimit dhe korrupsionit, i Kurtit dhe Mustafës”.

Mustafa përmes një postimi në llogarinë e vet në “Facebook” ka shkruar se deklarata e Veselit se koalicioni ndërmjet Mustafës dhe Kurtit do të jetë koalicion i korrupsionit dhe i izolimit është huqje e llojit të vet. “Asgjë më e mirë nuk pritet prej tij. Po e vërteton që s’po arrin të jetë politikan, por mbetet një i dështuar në zejen e vjetër të tij”, ka shkruar Mustafa.

Ai ka theksuar se koalicioni PAN, i drejtuar nga PDK-ja me Qeverinë Haradinaj rrënoi çdo urëlidhje me BE-në dhe ShBA-të.

Postimi i plotë i Mustafës:

Qytetarë të nderuar,
Koalicioni PAN, i drejtuar nga PDK, me Qeverinë Haradinaj, rrënoi çdo urëlidhje me BE-në dhe SHBA-të.
Kryetari i PDK-së, z. Kadri Veseli, dje në Shtërpce dhe Ferizaj konfirmoi dy gjera me rëndësi. E para, se po fiton LDK-ja dhe, e dyta, se e ka marrë vesh që s’ka koalicion me PDK-në.
Deklarata se Koalicioni ndërmjet Mustafës dhe Kurtit do të jetë koalicion i korrupsionit dhe i izolimit është huqje e llojit të vet. Por, asgjë më e mirë nuk pritet prej tij. Po e vërteton që s’po arrin të jetë politikan, por mbetet një i dështuar në zejen e vjetër të tij.
Sa i përket koalicionit ndërmjet LDK-së dhe VV, konsideroj se gjasat janë shumë reale. Ky koalicion i drejtuar nga LDK mund ta luftojë krimin dhe korrupsionin dhe të hapë rrugën e integrimeve euroatlantike të Kosovës. Këtë e dëshmon fakti se në qeverisjen e LDK-së nuk ka pasur asnjë aferë korruptive dhe asnjë ministër me aktakuzë dhe se në atë periudhë është nënshkruar Marrëveshja e parë kontraktuale me BE-në, Marrëveshja për Stabilizim-Asocim.
Me fitoren e LDK-së më 6 tetor, Kosova do të ketë qeveri evropiane me një kryeministre evropiane, e cila do t’i ketë dyert e hapura në Bruksel dhe Uashington.