Ish-kryetari i Komunës së Prishtinës, Isa Mustafa, ka dalë me një reagim lidhur me idenë e kryetarit të Prishtinës, Përparim Ramës, i cili ka paralajmëruar se shumë shpejt në kryeqytet do të vendosen kamera me inteligjencë të lartë.

Ai i është referuar një shkrimi të ish-ministrit Dardan Gashi, i cili është deklaruar kundër kësaj ideje të Ramës.

Mustafa ka thënë se ide të tillë ka pasur edhe ai me bashkëpunëtorë në vitin 2012, por se pas një vizite në një shtet joevropian, ishte bindur se Prishtina nuk ka arsye të vendosë kamera të tilla.

Mustafa ka thënë se është kundër asaj që të vëzhgohet nga kamerat.

“Mua mu duk se Prishtina nuk ka arsye për këtë. Kur u ktheva ua kumtova bashkëpunëtorëve të mi se ne nuk duhet të bëjmë këtë, sepse nuk kemi të drejtë të mbikëqyrim çdo lëvizje të këmbëve e duarve, hundës e buzëve, e se kush me kënd gjendet në makinë… çdo përshëndetje të burrave e grave, të vajzave e të djemve, sepse mund tu krijojmë probleme, pa e bërë ata asnjë faj. Unë me shkopin tim, në qytetin tim nuk pajtohem të vëzhgohem nga kamerat, sepse shkopin e mbaj për arsye shëndetësore e jo që ta cenoj askënd!”, ka shkruar Mustafa në “Facebook”.

Ish-ministri Dardan Gashi ka thënë se vëzhgimi me kamera “është shkelje e të drejtave të garantuara me Kushtetutë që askush nuk guxon të monitorohet pa arsye e vendim gjyqësor. Përdorimi i kamerave inteligjente është një invazion brutal në të drejtat individuale dhe privatësinë e kosovarëve”.

Ndryshe, Rama ka deklaruar para dy ditësh se këtë fillimvit do të vendosen kamerat e sigurisë të cilat do t’i monitorojë policia e vendit.

“Këto kamera kanë një inteligjencë të lartë artificiale, prodhim amerikano – kanadez, të cilat do t’na ndihmojnë që përmes policisë, të bëjmë identifikimin e personave të cilët hedhin mbeturina, parkojnë në trotuare apo vende ku nuk lejohet”, ka shkruar Rama.