Kryetari i Lidhjes Demokratike të Kosovës, Isa Mustafa, ka thënë se intervenimi i Aleancës Veriatlantike ndaj caqeve ushtarake serbe, para 20 viteve, ishte dita e përcaktimit të fatit për kosovarët.

Mustafa përmes një postimi në llogarinë e vet në “Facebook”, ka shkruar se “NATO-ja dhe vlerat perëndimore janë dhe mbeten besim dhe synim i yni i palëkundur”.

Postimi i plotë i tij:

Intervenimi i Aleancës Veriatlantike ndaj caqeve ushtarake serbe, para 20 viteve, ishte dita e përcaktimit të fatit tonë. Kjo është ditë e reflektimit të vlerave demokratike e humanitare të shteteve të Perëndimit, të udhëhequra fuqishëm nga Shtetet e Bashkuara të Amerikës.  

Ndërhyrja e NATO-s, krahas rezistencës paqësore të ideuar dhe të drejtuar nga Presidenti Historik, Ibrahim Rugova dhe luftës heroike të UÇK-së, hapi horizontin e lirisë në Kosovë. Në vatrat e tyre të djegura e të shkatërruara u kthyan mbi një milion njerëz që ishin deportuar nga ushtria dhe forcat paramilitare serbe. 

NATO dhe vlerat perëndimore janë dhe mbeten besim dhe synim i yni i palëkundur. Gjithëherë do u jemi mirënjohës! IM