Kryetari i Bashkësisë Islame të Republikës së Kosovës, Myftiu Naim ef. Tërnava, ka pritur sot në takim ambasadorin e Republikës së Turqisë në Prishtinë, Çagri Sakar.

Me këtë rast, myftiu Tërnava i ka dëshiruar mirëseardhje ambasadorit Sakar dhe ka falënderuar për vizitën duke e njohur me organizimin e BI-së së Kosovës.

Myftiu Tërnava ka falënderuar përmes ambasadorit Sakar, Republikën e Turqisë për ndihmën që i ka ofruar Kosovës gjatë dhe pas luftës si dhe në lobimin që bën Turqia që shteti ynë të njihet edhe më shumë në skenën ndërkombëtare si dhe për integrimin e Kosovës në mekanizma rajonalë dhe në ata ndërkombëtarë.

Ai më pas edhe një herë ka shprehur qëndrimin dhe angazhimin që ka BIRK-u që Kosova të jetë një vend i qetë, ku të gjitha komunitetet fetare të jetojnë në paqe, dashuri dhe me respekt të ndërsjellë

“Ne shprehim konsideratën tonë ndaj Republikës së Turqisë për përkrahjen që i ka dhënë Kosovës gjatë ngjarjeve më të rëndësishme për lirinë dhe për shtetndërtimin e saj”, ka thënë Tërnava.

Ai ka vlerësuar lart bashkëpunimin me shtetin mik të Turqisë, duke theksuar ndihmën në shumë fusha si në jetën ekonomike, kulturore, sociale, edukative dhe për këtë ndihet falënderues dhe mirënjohës për popullin dhe për qeverinë turke.

Nga ana e tij, ambasadori turk Çagri Sakar ka falënderuar myftiun Tërnava për pritjen dhe ka premtuar se Turqia si një vend mik dhe aleat i fuqishëm i Kosovës do të vazhdojë të ndihmojë në projekte në të dobi të qytetarëve të Kosovë dhe do të angazhohet edhe më fuqishëm për integrimin e Kosovës në mekanizma rajonalë dhe në ata globalë.

/Epoka e re/