Kryetari i Bashkësisë Islame të Kosovës (BIK), myftiu Naim ef. Tërnava, i shoqëruar nga një pjesë e kabinetit të tij, ka vizituar Këshillin e Bashkësisë Islame (KBI) të Gjakovës.

Gjatë kësaj vizite, ai është pritur nga kryetari i këtij këshilli, Valon ef. Myrta.

Kryetari Myrta e ka njoftuar myftiun Tërnava me rrjedhën e punës dhe jetës fetare në Gjakovë, me theks të veçantë për masat që janë duke u aplikuar në parandalimin e pandemisë Covid-19, si dhe për koordinimin e mirë që kanë me organet komunale që bashkërisht të kontribuojnë në parandalimin e saj.

Më tutje, ai ka falënderuar myftiun Tërnava për përkrahjen e vazhdueshme që ka dhënë Kryesia e BIK-ut për të gjithë këshillat në këtë kohë.

Ndërsa myftiu Tërnava ka shprehur falënderimet për KBI-në e Gjakovës dhe për imamët në të gjitha xhamitë për punën dhe angazhimin që po tregojnë, që të jenë në shërbim të plotë të xhematit, në mënyrë që amanetin e marrë nga Zoti ta çojnë në vend.

Ai ka premtuar se përkrahja dhe ndihma e Kryesisë do të jetë e vazhdueshme për realizimin e projekteve të synuara të KBI-ve.