Nadali: Nuk do të shkatërroj veten për ta thyer rekordin e Federerit
Rafael Nadali nuk arriti ta thyejë rekordin e 20 grand slameve që ai dhe Roger Federeri ndajnë së bashku. Tenisti spanjoll u eliminua dy ditë më parë në çerekfinalet e Australian Openit, ndaj parakalimi që ai synonte të bënte ndaj Federerit është shtyrë për më vonë.
“Mendoj se është e drejtë që një njeri të ketë ambicie, por për t’ia dalë mbanë duhet të jetë i shëndetshëm. Nuk duhet që ajo ambicie të të shkatërrojë, për ta arritur me çdo kusht. Unë nuk do të ‘vras veten’ për ta thyer rekordin e Rogerit”, ka thënë Nadali.
“Nuk jam afruar kurrë në këtë sport duke menduar ashtu. Unë luaj sipas standardeve dhe mundësive të mia. Dua të kthehem në shtëpi i lumtur se kam dhënë maksimumin në fushë. Në Australian Open ndoshta bëra një gabim, por edhe lodhja bëri të vetën”, ka deklaruar Nadali.