NATO ka dy deri në tre vite për t’u përgatitur për një sulm rus. Paralajmërimi vjen nga shefi i shtabit të ushtrisë norvegjezë, gjenerali Eirik Kristoffersen, raporton La Reppublica. Duke diskutuar aftësinë e Rusisë për të rindërtuar forcat e saj gjatë luftës në Ukrainë, gjenerali Eirik Kristoffersen tha se: “Do të duhet kohë, e cila na jep një afat kohor prej 2 deri në tre vite për të rindërtuar forcat tona”. Kujtojmë se në janar ministri gjerman i Mbrojtjes paralajmëroi se Rusia mund të sulmojë NATO-n në 5 ose 8 vitet e ardhshme.

Deklaratat shqetësuese të shteteve të NATO-s, vijnë pas intervistës së presidentit të Shtetetve të Bashkuara, Joe Biden për revistën britanike Times. Biden shprehu mbështetjen për Ukrainën pasi në të kundërt Rusia nuk do të mund të ndalet më.

“Nëse e lëmë Ukrainën të bjerë, mbajini mend fjalët e mia, do të shihni Poloninë të fundoset dhe do të shihni të gjitha ato kombe përgjatë kufirit aktual të Rusisë të pushtohen”, tha Joe Biden, President i SHBA.

Mbështetja e SHBA për Ukrainën ka sjellë shqetësime në Kremlin, të cilët nëpërmjet zëdhënësit të saj, Dmitry Peskov, bëjnë me dije se marrëdhëniet midis dy superfuqive të botës janë në pikën më të ulët. Rusia sot është një vend armik i Shteteve të Bashkuara, ashtu si Shtetet e Bashkuara janë armik i Rusisë, tha Dmitry Peskov për mediat ruse. Instruktorët ushtarakë perëndimorë që disa vende, si Franca, mund të dëshirojnë t’i dërgojnë në Ukrainë “nuk do të mbrohen nga imuniteti”, shtoi më tej Peskov. “Nuk ka rëndësi nëse janë francezë,” shtoi Peskov.

Komandanti i forcave ukrainase, Oleksander Sirski, spekuloi javën e kaluar se Franca së shpejti do të dërgonte instruktorë dhe u kërkoi partnerëve të tjerë perëndimorë t’i bashkohen “projektit ambicioz” të Parisit. Presidenti francez, Emmanuel Macron, nuk e ka përjashtuar dërgimin e ushtarëve francezë në Ukrainë, duke nënvizuar se asnjë vijë e kuqe nuk mund të ngrihet në konfliktin e vazhdueshëm.