NATO nga nesër do të nisë stërvitjet ushtarake, të cilat do të përfshijnë praktikimin e përdorimit të armëve bërthamore të Evropës.

Si pjesë e praktikës intensive, deri në 60 avionë do të trajnojnë fluturime mbi Belgjikë, Detin e Veriut dhe Britaninë.

Avionët e përfshirë në stërvitje do të jenë avionë luftarakë të teknologjisë së lartë dhe bombardues amerikanë B-52 me rreze të gjatë.

Pavarësisht tensioneve të fundit, stërvitja rutinë nuk është e lidhur me ngjarjet aktuale botërore, sipas NATO-s.

Zëdhënësja e NATO-s, Oana Lungescu, tha se stërvitja synon të sigurojë që parandalimi bërthamor i NATO-s të mbetet i sigurt dhe efektiv.

Stërvitjet do të zhvillohen në Belgjikë dhe do të përfshijnë 14 vende evropiane, raporton DailyStar, transmeton Klankosova.tv.

Kjo vjen pasi presidenti rus, Vladimir Putin kërcënoi se luftimet e drejtpërdrejta me vendin e tij do të rezultonin në një “katastrofë globale”.