Politikani opozitar rus i burgosur, Aleksei Navalny, ka bërë thirrje për protesta këtë fundjavë kundër pushtimit të paprovokuar të Ukrainës nga Moska.

Kritiku më i zëshëm i Kremlinit më 11 mars i ka kërkuar lëvizjes kundër luftës që të linte mënjanë frikën e arrestimit dhe të dilte në rrugë në atë që “padyshim nuk është një luftë e kotë”.

“Maniaku i çmendur Putin do të ndalohet më shpejt nga populli i Rusisë nëse ata kundërshtojnë luftën”, ka thënë ai në postim në rrjetet sociale.

Rusia ka nisur pushtimin e saj të Ukrainës më 24 shkurt, duke shënuar sulmin më të madh ndaj një vendi evropian që nga Lufta e Dytë Botërore.

Moska ka thënë se Ukraina përbën një kërcënim për sigurinë e saj.

Navalny ka thënë se që nga ajo kohë, “propaganda e Putinit” ka fshehur shkallën e viktimave dhe ka gënjyer për arsyen e luftës dhe shkatërrimin që ajo po u bën të dy vendeve.

“Nëse besojmë (sondazhet e opinionit), një në tre mbështetën lëvizjen kundër luftës në fillim të konfliktit. Dhe kjo ishte përpara se lufta të na godiste edhe ne, me sanksione dhe katastrofë ekonomike. Përpara tmerrit kryesor të luftës – arkivole me djemtë që ktheheshin te nënat e tyre”, ka shkruar ai.

Që kur Rusia nisi pushtimin e saj, pothuajse 14 000 njerëz janë arrestuar nga policia për protesta kundër konfliktit, sipas “OVD-Info”, një organizatë jofitimprurëse që monitoron arrestimet e policisë në mbarë vendin.