Opozitari i burgosur rus, Alexei Navalny, kritiku kryesor i Vladimir Putinit, është shpërblyer të mërkurën me çmimin më të lartë të BE-së për të drejtat e njeriut, Çmimin Saharov.

Në një shenjë të kritikës së hapur ndaj Kremlinit, udhëheqësit e Parlamentit Evropian e zgjodhën politikanin e njohur rus për t’ia dhënë çmimin e njohur. Në mesin e kandidatëve tjerë ishin një grup i grave afgane dhe ish-presidentja e përkohshme e Bolivisë, Jeanine Anez.

Grupi i partive kristian-demokrate në Parlamentin Evropian e kanë bërë me dije lajmin në faqen zyrtare në “Twitter”.

“Z. Putin, liroje Alexei Navalny-n. Evropa bën thirrje për lirinë e tij dhe të gjithë të burgosurve tjerë politikë”, është thënë në postimin e këtij grupi.

Dhënia e këtij çmimi Navalny-t pritet të përbëjë përkeqësim të ri të raporteve mes Bashkimit Evropian dhe Rusisë. Raportet mes dy fuqive kanë qenë edhe ashtu në rënie prej vitit 2014, kur Rusia e ka aneksuar Krimenë nga Ukraina.

Vitin e kaluar, BE-ja vendosi sanksione kundër gjashtë zyrtarëve të lartë rusë nën dyshimin për përfshirjen e tyre në helmimin e Navalny-t. Rusia ka mohuar se është e përfshirë në helmimin e politikanit, shkruan “Independent”, raporton “GE”.

Zyrtarisht, çmimi Navalny-t do t’i ndahet më 15 dhjetor në një seancë të Parlamentit Evropian në Strasburg të Francës. Shpërblimi financiar për fituesin e çmimit është 50 mijë euro.

Ndryshe, Çmimi Saharov më 1991 i është dhënë figurës së njohur të rezistencës në Kosovë, Adem Demaçit, ndërsa në vitin 1998 edhe presidentit Ibrahim Rugova.