Kapiteni i Sevillas Jesus Navas do të largohet në fund të sezonit. Kështu ka konfirmuar të enjten klubi i La Liga-s. Mbrojtësi veteran ka fituar tetë trofe gjatë dy periudhave të gjata duke mbuluar 17 sezone në ekipin ku ai filloi karrierën e tij.

“Navas do të largohet nga Sevilla në fund të sezonit 2023/24… kapiteni i tha klubit, shokëve të tij dhe stafit stërvitor në seancën stërvitore këtë mëngjes”, thuhet në deklaratën e lëshuar nga Sevilla.

Navas ka luajtur 688 ndeshje për Sevillan në të gjitha garat, duke bërë paraqitjen e tij të 500-të në La Liga për skuadrën andaluciane në mesjavë. Spanjolli ka shënuar 39 gola dhe ka dhënë 119 asistime në kohën e tij te Sevilla, duke filluar karrierën e tij si anësor dhe më pas duke luajtur si mbrojtës i djathtë.

Navas ka fituar katër tituj të Europa League, dy triumfe në Copa del Rey, Superkupën e Evropës dhe Superkupën e Spanjës gjatë kohës së tij në klub.

Në vitin 2013 Navas u largua për në Manchester City, ku fitoi Premier Leagën dhe dy Kupa të Ligës, më vonë u kthye në Sevilla në 2017. Navas ka fituar më shumë trofe dhe ka luajtur më shumë ndeshje për Sevillan se çdo lojtar tjetër në historinë e klubit.

Me Spanjën mbrojtësi fitoi Kupën e Botës në 2010, Kampionatin Evropian në 2012 dhe Ligën e Kombeve në 2023.