Prishtina dhe Ballkani janë ndarë baras 2:2 në derbin e madh të kësaj jave.

Pjesa e parë në stadiumin “Sami Kelmendi” në Lipjan është mbyllur pa gola, kurse në të dytën janë shënuar plot katër.

Ishte Bujar Pllana, i cili ka kaluar vendasit në epërsi në minutën e 51-të të ndeshjes.

10 minuta më vonë, Endrit Krasniqi, ka shënuar për ta dyfishuar epërsinë e prishtinasve.

Ballkani ka arritur ta ngushtonte epërsinë në minutën e 80-të me një gol të bukur të Nazmi Gripshit.

Një ndërhyrje e palejuar në zonë nga portieri i Prishtinës, Kolaj ia ka dhuruar një penallti Ballkanit në sekondat e fundit të ndeshjes.

Nga pika e bardhë, i saktë ishte Albion Rrahmani, i cili ia ka siguruar një pikë klubit suharekas

Me këtë barazim, Ballkani shkon në kuotën e 49 pikëve në vendin e parë, dy më shumë se Drita.

Në anën tjetër, Prishtina mbetet e katërta me 31 pikë gjithsej.

Pa fitues e pa gola është mbyllur ndeshja në mes të Trepçës’89 dhe Malishevës e zhvilluar në stadiumin “Riza Lushta” në Mitrovicë.

Ky barazim nuk i ka konvenuar asnjërës skuadër, të cilat po luftojnë për mbijetesë.

Aktualisht, Trepça’89 ka 23 pikë në vendin e nëntë në tabelë, kurse Malisheva mbetet e shtata me 25 pikë të grumbulluara.