Përfaqësuesja e Kosovës në basketboll  do t’i ketë dy ndeshje shumë të rëndësishme në kuadër të parakualifimeve evropiane për Kupën e Botës 2023.

“Dardanët” do të luajnë në shtëpi kundër Luksemburgut (18 shkurt) dhe Sllovakisë (20 shkurt), në ndeshjet e fundit në Grupin B. Të dy takimet zhvillohen nga ora 19:00 dhe do të transmetohen nëpërmjet partnerit medial të FBK-së, “Kujtesës” dhe në “Televizionin T7”, që u mundëson të gjithë shikuesve të shohin këtë ndeshje, pasi nuk do të kenë mundësi të jenë në palestër për shkak të masave anti-Covid.

Për informacione të tjera rreth këtyre dy ndeshjeve, por edhe të gjitha takimeve të Grupit B, që do të zhvillohen në Prishtinë, do të mund të informoheni në faqen zyrtare të FBK-së dhe rrjetet e saj sociale. Për shkak të masave anti-Covid, takimet do të zhvillohen pa shikues dhe pa media. Kjo është në bazë të protokollit nga FIBA, që ka kërkuar që të respektohen të gjitha rregullat në përpikëri dhe nuk do të ketë asnjë lëshim për askënd. Tifozët e Kosovës “dardanët” gjithmonë kanë përkrahur basketbollistët e Kosovës, megjithatë, kjo fatkeqësisht nuk do të jetë e mundur kësaj radhe përkundër përpjekjeve të FBK-së.

Basketbollistët e Kosovës janë duke u përgatitur nga dita e martë për këto dy ndeshje shumë të rëndësishme. Nëse “dardanët” shënojnë dy fitore në dy takimet e zhvilluara, atëherë do të kualifikohen në rrethin e ardhshëm. Të gjitha ndeshjet e Dritares së Tretë të Grupit B do të zhvillohen në Prishtinë. Ky ishte vendimi i mëhershëm nga Bordi i FIBA Evropës, duke i besuar edhe një ngjarje të rëndësishme Federatës së Basketbollit të Kosovës.

ORARI

Më 18 shkurt takohen:
16:00 Sllovakia-Islanda
19:00 Kosova-Luksemburgu

Më 20 shkurt takohen:
16:00 Luksemburgu-Islanda
19:00 Kosova-Sllovakia