Një gjykatë në Vjenë dënoi katër persona që ndihmuan personin e armatosur të kryente sulmin e parë vdekjeprurës xhihadist në Austri. Dy prej tyre u dënuan me burgim të përjetshëm, ndërsa dy të tjerë me 19 dhe 20 vjet burg.

Simpatizanti i grupit “Shteti Islamik”, Kujtim Fejzulai, vrau 4 persona dhe plagosi 23 të tjerë në një sulm të armatosur më 2 nëntor 2020 në qendër të Vjenës, përpara se policia ta qëllonte për vdekje.

Dy vjet më vonë, gjashtë të pandehur, katër austriakë, një çeçen dhe një kosovar, u gjykuan për ndihmën e Fejzulait që të përgatitej për të shtënat, edhe pse ata nuk ishin të përfshirë drejtpërdrejt në sulmin vdekjeprurës.

Pasi juria diskutoi për rreth dhjetë orë, vendimet u shpallën rreth mesnatës nga kryetari i trupit gjykues.

Një burrë u dënua me burgim të përjetshëm për “kontribut në vrasje” dhe një tjetër u dënua me të njëjtin dënim për pjesëmarrje në krime terroriste në lidhje me vrasjen.

Dy burra të tjerë që përballeshin me akuzën kryesore u dënuan përkatësisht me 19 dhe 20 vjet burg, ndërsa dy të fundit të grupit u shpallën të pafajshëm.

Por ata u shpallën fajtorë për anëtarësim në një organizatë terroriste dhe secili u dënua me një burg të kushtëzuar prej dy vjetësh.

Për gati katër dekada, Vjena i kishte shpëtuar llojit të sulmeve në shkallë të gjerë që kanë goditur kryeqytetet evropiane si Parisi, Londra dhe Berlini. Kjo ndryshoi më 2 nëntor 2020, kur personi i armatosur goditi në zemër të qytetit të vjetër. /A2CNN