Ministri i Brendshëm i Pakistanit, Rana Sanaulah Khan, ka thënë se rreth 350 pakistanezë ishin në bordin e anijes për peshkim, e stërmbushur me emigrantë, e cila është fundosur në Greqi, më 14 qershor.

Ministri Khan ka thënë se shumë prej tyre janë të zhdukur dhe mund të kenë vdekur në një nga incidentet më vdekjeprurëse në Detin Mesdhe.

Khan u ka thënë deputetëve në Parlament se rreth 700 emigrantë ishin në anije, kur ajo u fundos më 14 qershor.

Vetëm 104 persona, përfshirë 12 pakistanezë janë shpëtuar dhe 82 trupa janë nxjerrë të vdekur.

Khan ka theksuar drojën se shumë nga pakistanezët e zhdukur kanë vdekur.

“Deri më tani, 281 familje kanë kontaktuar me qeverinë duke thënë se djemtë ose të dashurit e tyre mund të kenë qenë në mesin e atyre që ishin në anije”, ka thënë ai.

Aktualisht, zyrtarët po mbledhin mostra të ADN-së nga njerëzit që kanë thënë se anëtarët e familjes së tyre ishin në anije, për të ndihmuar në identifikimin e trupave.

Gjithashtu, qeveria ka nisur aksionin kundër trafikantëve të qenieve njerëzore që organizuan udhëtimin për pakistanezët, me një anije peshkimi, shumë prej të cilëve kërkonin punë në Evropë.

Policia deri më tani ka arrestuar së paku 17 të dyshuar në lidhje me këtë rast.

Zyrtarët kanë thënë se viktimat u paguanin kontrabandistëve nga 5 mijë deri në 8 dollarë për udhëtimin, raporton “Rel”.

Shumë nga pakistanezët e zhdukur janë nga provinca lindore më e populluar e Punjabit dhe qytetet e largëta në Kashmir, nga rajoni i kontestuar në Himalaje, i ndarë midis Pakistanit dhe Indisë.

Pakistani po përjeton një nga krizat e tij më të rënda ekonomike, me inflacion deri në 45 për qind në muajt e fundit, ndërkaq shumë të rinj kanë rrezikuar rrugën e tyre drejt Evropës, për të gjetur punë më të mira.