Përfaqësuesi i lartë i Bashkimi Evropian (BE), Josep Borrell, ka thënë se në Bruksel aktualisht është duke u mbajtur takimi i Komitetit për Siguri dhe Politikë, të cilët po diskutojnë për masa të mundshme ndaj Kosovës e Serbisë në rast se palët s’i dëgjojnë hapat e propozuar për shtensionim të situatës.

Ai ka thënë se për situatën e krijuar ka dërguar në Kosovë edhe zëvendëssekretarin e përgjithshëm për sigurinë dhe mbrojtjen e përbashkët i Bashkimit Evropian, Charles Fries.

“Ndërkohë shtetet anëtare janë informuar rreth zhvillimeve dhe derisa ne flasim tani ata janë informuar në Komitetin për Siguri dhe Politikë dhe kanë diskutuar për masat që duhet ndërmarrë derisa palët vazhdojnë të rezistojnë ndaj hapave të propozuar drejt deeskalimit. Palët pritet që të kontribuojnë për bashkëpunim të frytshëm rajonal për sigurinë në Evropë dhe të tejkalojnë trashëgiminë e të kaluarës”, ka thënë Borrell.

Borrell ka thënë se ka mjaft dhunë aktualisht në Evropë dhe se më s’mund të përballojnë një konflikt tjetër.

“Ka mjaft dhunë, ka pasur mjaft dhunë. Ne kemi shumë dhunë në Evropë sot. Ne nuk mund të përballojmë një konflikt tjetër dhe shpresoj që zëri ynë të dëgjohet dhe që njerëzit të sillen sipas kësaj kërkese”, ka thënë ai.